Film: The Girl with the Dragon Tattoo | Artikel, Filmkritik | brainfood

Film: The Girl with the Dragon Tattoo

The Girl with the Dragon Tattoo – David Fincher (2011)

Kann een eng berechtegt, wäertvoll an onparteiesch Filmkritik zum US-Remake vun der Stieg Larsson-Verfilmung The Girl With The Dragon Tattoo schreiwen wann een weder d'Bicher gelies, nach déi schwedesch Original-Verfilmungen gesinn huet an niewebäi souwisou Fincher-Fetischist ass? D'Äntwert: Nö!
Mee fir en T-Shirt-Sproch vun der Protagonistin Lisbeth ze zitéieren: "F*ck You You F*cking F*ck".

Hollywood adaptéiert mëttlerweil net nëmmen seng eegen Filmer di virun puer Joer erauskomm sinn (The Amazing Spiderman), mä grad sou gär aktuell Wierker aus Europa. D'Amerikaner hunn villäicht keng Ënnertitel-Kultur, mä et ass awer schued dass interessant Konzepter dohannen nëmmen ukommen (an schlussendlech villäicht och international), wann den Cast aus bekannten Nimm aus Hollywood besteet. Mee bei engem Regisseur wei dem David Fincher kann een sech dat Ganzt jo mol wéinstens ukucken.

the-girl-with-the-dragon-tattoo-poster

D'Geschicht baséiert um éischten Roman aus der Millennium-Trilogie vum schwedeschen Auteur Stieg Larsson. An dat Universum ass wei fir den David Fincher gemaach: en düsteren Krimi-Thriller voller mënschlecher Ofgrënn – Mord, Intrigen, Ligen, Vergewaltegungen, Seriemäerder, Verstümmelungen, etc. An den Realisateur ass sech och net ze schued dovunner an senger direkter Bildsprooch ze profitéieren, vun enger „prüder Ami-Versoftung" ass sécher net ze schwätzen. Bei enger Lafzäit vun 158 Minutten spueren ech mer elo op d'Detailer anzegoen, mä fest steet: mam  Stoff léisst sech schaffen!

An The Girl With The Dragon Tattoo zitéiert den Fincher rëm am léifsten sech selwer: Eng niichter an direkt Bild- an Storygestaltung vun enger Seriemäerder-Thematik wei schonns an Se7en an Zodiac, hannerluecht mat engem grandiosen Soundtrack vum Trent Reznor an Atticus Ross wei schonns an The Social Network. Gekoppelt mat den gelongenen schauspillereschen Leeschtungen geléngt eng bedréckend Stëmmung, an schlussendlech den ganzen Film.

Kuerz virum Schluss fält d'Geschicht zwar kuerz an den typeschen Hollywood-Genre eran andeems nach d'Mafia an diffus Bankkontoen mat agebaut ginn, mä villäicht huet jo hei och d'Buchvierlaag d'Schold.

Ass den US-Remake besser wei d'schwedescht Original? Keng Ahnung. Kann een di zwee villäicht net mateneen vergläichen? Keng Ahnung. Ass den Film villäicht just eng 1-zu-1-Ëmsetzung vun gelongenen Szeenen wei se den Roman schonn beschreift? Keng Ahnung. Alles wat ech ouni Recherche kann soen ass : Wow! Ech mengen mat sou engem Wuert/Fazit däerf eigentlech keng anstänneg an neutral Filmkritik ophalen... Egal, f*ck you!

- Cédric Kieffer


| zréck |
blog comments powered by Disqus